08‏/05‏/2015

مش عارف ليش ( إحنا ) الشباب بشكل عام ..

مش عارف ليش ( إحنا ) الشباب بشكل عام .. 
اذا حكينا مع ( بنت ) ١٥ دقيقه أو اكثر .. بيصحى عنا شرش ( الغِيرة ) .. وبقلب معنا الجو الشرقي الاصيل !!

يعني انا شخصيًا عاصف درويش .. مرة بعتت آدد لبنت عالفيسبوك .. مش عارف كيف وافقت ،، شكلو بالغلط او مشبهه عليي او اصلا هيه مش بنت !! 
المهم انا كأي شب ،، اول اشي بنفوت عالصور .. طبعا اذا شفت صورتها مع اي شب .. بزعل وبتدايق و بغار .. حتى لو كان ابن خالتها اللي جاي من الكويت بالعيد ،، وعاجقة حالها فيه !! 
المهم صار الحوار التالي : 
- مرحبا ،، انتا بتعرفني اشي؟! 
لا والله ما بعرفك .. انا عاصف درويش من غزة .. بس مين الشب اللي متصورة معو ؟!
وليش فاتحه صورك للكل؟!
بعدين ليش متصورة عالبحر ؟!
انتي بتحبي؟!
 مرتبطه ؟!
 طب خاطبه ؟!
والله شكلك بتحبيه للشب اللي بالصورة !!
بس مش لابقين عبعض ،، انتي احلى ،، بعدين اضافرك كتير حلوين .. ولبسك رائع ،، انتي من غزة ؟!
طب وين ساكنه ؟!
عفكرة ازا حبينا بعض ديري بالك انا بغار كتير ههههه ، طب انتي شو دارسه؟!
شكلك مشغوله عالواتس اب صح؟!
طب اعطيني الواتس اب تبعك هههههه .. كأني طلبت رقمك هههههه .. اسمعي مع مين مشغوله ؟!
خلص ازا مش فاضيه بنحكي بعدين .. اسمعي انا بحبك والله بحبك من لما شفت صورتك .. وبدي تكوني الي لحالي و بس .. عنجد بحبك .. مواه مواه .. عفكرة انا شب منيح وقصدي شريف !!

- بتحبني؟؟؟؟! 
طيب ماشي .. هي رقم بابا .. رن عليه وتعال اطلبني ازا بتحبني !! 
- وينك؟؟ وين رحت 
- الوووووو 
- عاصف
- ولك وينك ؟! 
- ؟؟؟؟؟؟؟؟؟؟؟ 
- وينك يا روميوووو .. يا غيران .. يا مبلي .. يا ابو قصد شريف ؟! 
- عفكرة مبين انك بتقرأ المسجات seen 
- ولك وووووين رحت ؟؟!

اه معك .. انشغلت شوي .. والنت عندي بطئ .. واللابتوب خلص شحن .. والكهربا انقطعت ،، وابن خالتي وقع عن السطح .. وشكلي بدي افلوز . بدي اخد بنادول و انام وبس اصحى ببعتلك ازا كنت فاضي .. اقولك انا اصلا بحكيش مع بنات ،، انا اصلا تبع *** .. وانتي بنت حلوة ومليون شب بتمنوكي ،، انا لسا بأسس حالي .. و امي ما بدها تجوزني الا لبنت خالتي .. اقولك يلا باي!

احنا الشباب بدنا بنت ( حُب ) ٤ سنين .. طلعات ومشاوير وواتس اب وتانغو ،، وتغار عليها وتخنقها ،، وازا اجاها عريس بنتدايق وبنعصب ،، واوعي توخديه او توافقي .. والبنت بترفض الاول والتاني والتالت ( السابع شالوه ) والبنت بضيع عمرها حُب ..
وتنتهي العلاقه عند اول موضوع بينفتح عن الخطبة !!
بحجة بأسس حالي !! 
او بدي اسافر ع السويد سنتين وراجع ،، استنيني حبيبتي .. واستني يا كبييييره !!

يلا باي عمي 

ليست هناك تعليقات:

إرسال تعليق