قرفان
وفش اشي اسويه مع القرف قعدت احك بشعري ايش اعمل صرت العب فيه بتحبني لا ما بتحبني
, وغير من تسريحته.. يعني بفك زهق..
ايش هاد
؟ شعري بيوقع !ليكون معي سرطان, يا ساتر .. لا يا زلمة قول وغير ,ولك هاد من الجل
,ما هو من التسريحة اللي الها سنة زي ما هي .
طيب ليش
ما اغير هالتسريحة ؟ انا فكرت بالموضوع بجد ,بس كيف اخليه ؟اعمل على جنب ؟ لا ..
الناس بتستهبلني ,وبتحكي عني اهبل ..
طيب
اربيه؟ لا بصيروا يقولوا عني فافي ,وبتمقلزوا عليا,وانا مش ناقصني مقلزة بيكفي
كلمة تافه ,اللي بسمعها دايماً , طيب اخليه كوكو ؟؟ بس يا هبل ,كوكو ؟ ولك انت
بغزة ,بينفعش كوكو ,بتصير بايع الوطن, وبتصير ملطشة لكل خلق الله , طيب اقرع مش
حلو عليا , ايش اعمل ؟؟
خلص خلص
خليه زي ما هو احسن مش مغير فيه اشي , انا اساسا كل ما افكر بالموضوع بعرف انه راح
اياس وحاخليه زي ما هو ,عشان فش جراة عندي لاني ببساطة هامل , وحتي يوم ثورة اذار
هادي اللي طلعت السنه الى فاتت ضد الانقسام , والقصة واللمة والهليلة اللي صارت
عشانها ,انا قلت لازم اروح يعني الشباب مش احسن مني كلهم رايحين , وانا ليش ما
اروح ؟
صرت
اتابع اخبارهم اول باول , وعملت حالي وطني ,شوية شوية صرت انزل من اليوتيوب اغاني
وفيديوهات للوطن ,وكل نص ساعة افتح الفيس اشوف ازا حد حطلي كومنت ولا لا ,فجاة صرت
وطني ,مش عارف ايش اعمل صرت استنى اليوم هادا يجي , عشان البس هالكوفية ,وهالعلم
الفلسطيني ,واقف مع اصحابي ..والشعب يريد انهاء الانقسام, الفكره دخلت راسي جامد
,طيب ,ليش ما اكون انا واحد من اللي ينظموا هالمسيرة ؟ همه احسن مني ؟ والله بعمل
نهفة , بلاقي مليون فرند ريكويست ,باليوم ,وبصير معروف يمكن حتي اتوظف , بدل
القعدة اللي انا قاعدها بالدار , بس انا اشد حيلي شوية , وانزل من اليوتيوب كمان
اغاني لجوليا بطرس ومارسيل , واعمل هيك ,وعليا الضمان لتلاقي حالك محبوس عند حماس ,
وبعدا بتطلع وبتصير بطل .
لا يخو
.. استني بديش انحبس ؟لا مش ناقصني , هو عشان اكون وطني لازم انحبس ؟ هيني على قد
حالي وماشي الحيط الحيط ,وانا اصلا ماليش بالسياسة ,انا ايش دخلني ؟ انا حتي يوم
ما طلعت المسيرة اول واحد شردت , بخاف انا يا عمي .
طيب
والناس ؟ مش هاقولهم اني شردت ..اخ هداك يوم ,روحت على الفيس ,وكتبت كلمتين بسب فيها
حماس انه ضربتنا , وعملت حالي شهيد واسير وجريح ,واخ يا رجلي واخ يا عيني واخ يا راسي .ها ؟ كيف بدي البنات
يقولولي سلامتك ؟ مش لازم اعمل حالي وائل غنيم ؟ واعمل حالي انضربت ؟ هواساسا وائل
غنيم كيف انشهر غير لما انضرب ؟ بس سيبك , والله العظيم بينحسد , مين قده هلقيت ,حواليه بنات خير الله , وهلقيت بيحكي
باسم الشعب .
مش
العيشة اللي صارت مولعة وتصرفات البشر غير مفهومة , بتمنى انه ما حدا ياخد الي
كتبته كتعميم وأي شخص وجد بنفسه تشابه مع الي قولته بتكون مجرد صدفة لا غير والله
يستر من هان لقدام عشر سنين أبصر شو راح يصير.
