يا جماعة البلد ضايعة، إشي بقول الضريبة كترانة،
وإشي بقول الحكومة غرقت أهلي بديون، وفي ناس بقولوا يا عمي البنزين مولع وأنا من
وين أجيب؟! أشحد مثلاً!
وبعدين مع هالحالة؟!
بدكم الصراحة الحكي فش منو، والشباب عن جد ضايعة
بهالقصة، ومرات بتزيدها حبتين، هالمرة أنا بدي أسبح عكس التيار وأقول إحنا بنبالغ
كتير في بعض المواضيع اللي بنطرحها، خليني أدخل بالموضوع عالسريع بدون لف ولا
دوران.
طبعاً حبلّش بموضوع الموسم: الحكومة فارضة علينا
ضريبة زيادة، مش هيك؟
طيب الحكومة زادت ضريبة الدخل على ميسوري الحال
اللي دخلهم السنوي 125 ألف شيكل وأكثر.
سؤالي: عزيزي الشاب هو إنت طايل نصهم؟ وإنت مالك؟
ليش زعلان خليهم يزيدوها على إللي مصاريهم كثيرة! بدكم الدغري؟ أنا بتحدى إنو نص
الشباب مش فاهمين موضوع الضريبة، من وجهة نظري القصة وما فيها إنو جزء من الشباب عم
بقيسوا الموضوع على أساس ارتفاع سعر المعسل! (غيّر مقياسك يا رجل خليه منطقي)!
ودليل إنو ما خصك، لما الحكومة اقترحوا موضوع الحوار الوطني، ودعوا مؤسسات القطاع
الخاص والشركات ما دعوك ولا جابوا سيرتك!
طيب عزيزي الشاب، ما سألت حالك ليش ما دعوك؟
لأنو يا
معلم، إنتا شو دخلك! التعديل الضريبي الجديد مش صايب مصرياتك.
ردك أكيد رح يكون: بالله ! لا لا في مؤامرة...
عزيزي الشاب: ارحمني من تحليلاتك! شايف إنك
بتزيدها.
موضوع الشتاء والصيف: الديون مغرقتنا والسبب
الحكومة والبنك الدولي ذبحنا.
عزيزي أبو ديون: هو البنك الدولي والحكومة قالولك
اشتري سيارة موديل 2012، (طيب 2007 مالها يا زلمة)!
حدا منعك تاخذ قرض إنتاجي أو مفيد (ستي زمان كانت
تقول السيارة زي قالب البوظة كل يوم بخس، وعزيزي الشاب رح أطمنك، جيبتك رح تخس ما
دام جدول أولوياتك مخربش).
أكيد ردك
رح يكون: الحكومة مش عم تعمل برامج توعية، طيب يا حلو هيّك معك موبايل وسيارة
وعندك فيسبوك وحرّيف عليهم، مين منعك ما تقرأ وتفهم حالك بحالك؟
إسحك تقول في مؤامرة بزعل منك!
عن جد بزعل!
ليست هناك تعليقات:
إرسال تعليق